Über uns

 

Üsi Gschicht

Mir heisse hüt  Jodlerklub Thun - Heimelig, Thun  u das sit em erschte Jänner 2014!    U so zäme singe tüe mer sit Aafangs 2013.

Aber üsi Gschicht faht ganz anders aa!

1928 isch der Jodlerklub Thun als erschte Jodlerverein im Thuner Stedtli gründet worde. U nume vier Jahr speter, im 1932, het d'Gründig vom Jodlerklub Heimelig stattgfunde.

D'Manne vom junge Jodlerklub Thun hei ganz underschiedlechi Härkunft g'haa. Das isch bim Jodlerklub Heimelig anders gsii! Dert si di erschte Mitglieder alli vom gliche Arbeitgäber, nämlech der eidgenössische Pferde-Regieanstalt, cho! Auso Lüt, wo näbscht em Singe o no Öppis vom Umgang mit Ross verstande hei.

Scho bald hei beid Vereine ihrne Aahänger a Könzärt u Unterhaltigsaaläss viel Freud törfe bereite. Aber o a Jodlerfescht u Uftritte im In- u Ussland hei si grossi Erfolge g'fyret!

U das isch mee als 75 Jahr i där Art wytergange, mit ganz guete, de aber o wieder chli schlächtere Zyte.

Fasch unbemerkt het sech i beidne Vereine na di na e Überalterig vo de Sänger breitgmacht. Junge Nachwuchs isch sältener worde u schliesslech fasch ganz usblibe. D'Jodlerstimme het me mit Froue chönne b'setze. Aber mit Begleitstimme isch es zuenähmend schwieriger worde.

U so het d'Mitgliederzahl i beidne Vereine mee u mee abgnoo. Di alte Manne si verstorbe oder hei eifach nümme möge. U jungi Sänger si i der Stadt fasch nümm z'finde! Das hätt über churz oder läng g'heisse: Ufhöre! U das hei mer doch nid wölle!

I beidne Vereine si Lüt g'sii, wo trotz Allem gärn hätti wyter g'sunge. Aber beidne Vereine hei wichtegi Mitglieder g'fählt! Bi de Einte sis Begleitstimme g'sii u bi de Andere d'Jodler/inne. U was liegt da neecher, als us zweene, nüm singfähige Vereine, Eine z'mache. Eine, wo wieder cha singe!

U genau Das hei mer gmacht. Im Früelig 2013 si mer z'erschte Mal zäme ufträte; no beid Vereine i ihrer aagschtammte Tracht. Im gliche Jahr si mer de no sächs wyterei Mal mit Erfolg vor Publikum g'stande. U im Dezämber 2013 hei mer b'schlosse, ab em erschte Jänner 2014 üser beide Vereine zu Eim zäme z'schliesse.

Heisse tüe mer iez Jodlerklub Thun - Heimelig, Thun. U B'chleidig vo de Manne isch der Mutz, wo der Jodlerklub Thun scho trage het.


Trotz em Zämegaa wäre mer froh um di einti oder anderi Versterchig! Mir sueche ufgstellti Sänger/inne i allne Stimmlage. U wet di aagsproche füelsch, so mäld di doch bi üs. Probe tüe mer geng am Mändig am Aabe am Achti im Gaschthof Rössli, Thun - Dürrenast. Äs würd is riesig freue! U fäge tuet's o binis. Chumm di doch eifach cho überzüge!    


Kontakt: 

Ruedi Grossen, Lärchenweg 4, 3700 Spiez
Tel.: 079 / 319 61 39
mail: ruedigross@bluewin.ch